CEBU, Philippines — Namatikdan nga gibisita na niining mga panahona sa mga lokal nga turista ang Barangay Caohagan sa Isla sa Olango sa Dakbayan sa Lapu-Lapu.
Kini maoy usa ka labing maayong timailhan alang sa mga molupyo sanglit makahatag man usab kini og kalamboan sa ilang panginabuhi pinaagi sa pag-andam kanila og nagkadaiyang matang sa pagkaon ug uban pa nilang panginahanglan sa ilang pagbisita sa maong lugar.
Si Caohagan Barangay Kapitan Ranilo Abayan miingon nga lakip sa ilang gilauman nga mobalik sa pagbisita sa ilang lugar mao ang mga langyaw nga turista.
Gumikan kay pinaagi usab niini makatabang kini sa mga molopyo sa pagpalambo sa ilang panginabuhi dili lang sa pagbaligya og pagkaon kon dili lakip na usab ang nagkadaiyang souvenir items.
Sa nasayran ang Barangay Caohagan maoy usa sa 11 ka barangay nga nahimutang sa Isla sa Olango sa Dakbayan sa Lapu-Lapu nga molanat og 20 ngadto sa 30 minutos nga pagbiyahe sakay sa motor banca gikan sa mainland sa maong dakbayan.
Nagsilbing panginabuhi sa mga molopyo sa maong lugar mao ang pagpanagat ug gipasigarbo usab nila ang puti nga bas sa ilang baybayon nga maoy hinungdan nga daghan ang madasig sa pagpangaligo.
Dugang nga gipasigarbo sa mga molopyo mao ang ilang marine sunctuary, dive spots ug uban pa. —MEL (BANATNEWS)