CEBU, Philippines — Dul-an sa kapin kun kuwang 200 ka mga bata ang nakapahimulos sa libreng tuli nga gihimo sa lungsod sa San Fernando.
Kini ubos sa paningkamot ni konsehal PJ Medalla, kinsa maoy chairman sa committee on health sa lungsod.
Si Medalla nagkanayon nga gidalit kini niya isip kaugalingong inisyatibo inabagan sa iyang pamilyang doktor ug sa mga Bautista.
Siya niingon nga inay mogasto og salapi sa pagpatuli sa ilang mga anak ang mga ginikanan sila na mismo ang nihatag niini nga libre.
Ang barangay San Isidro maoy ilang pinakauwahing operasyon nga nahimo niadtong miaging adlaw diin 50 ka mga bata ang ilang natuli.
Gipasalamatan usab ni Medalla ang Sangguniang Kabataan (SK) Federation President Riyadh Christopher Villasor Oacan, ingon man si kapitan Ranie Medicialo ug ang grupong AKRHO fraternity.
Dugang pa niya nga laing barangay nasab ang ilang bisitahon alang sa libreng tuli ug libreng tupi. —MEL (BANATNEWS)