CEBU, Philippines — Dili na kinahanglang mopaubos og mandatory quarantine ang mga gipapauli na nga Overseas Filipino Workers (OFW) ug Non-OFW nga mobiyahe padulong sa Probinsiya sa Sugbo gawas lang kun sila magpositibo sa COVID-19.
Si Cebu Governor Gwendolyn Garcia niluwat og bag-ong executive order alang sa mga mopauli nga Pilipino gikan sa abroad diin epektibo kini kagahapon. Sa maong EO ang OFWs ug non-OFW di na kinahanglang ipaubos sa mandatory quarantine. Hinuon kinahanglan nila nga kompletohon ang online Mactan-Cebu International Airport Passenger Registration Form pinaagi sa website sa MCIAA.
Kinahanglan usab nga adunay pre-booked sa hotel nga accredited sa Department of Tourism (DOT) nga maoy puy-an samtang gahulat sa resulta sa RT-PCR test. Ug kon negatibo sa COVID-19 mamahimo na nga makauli sa LGU of destination ang maong OFW gawas lang kon magpositibo ang RT-PCRA test.
Ugaling positibo ang OFW o non-OFW sa COVID-19 ang health protocols nga gipatuman sa DOH kalabot sa mga positibo ang sundon.
Si Garcia niluwat sa maong EO human sa iyang tigom uban sa opisyal sa national government agencies lakip na sa Overseas Welfare Workers Administration (OWWA), airport authorities sa Mactan Cebu International Airport (MCIA) ug mga miyembro sa pribadong sektor. —BDB (BANATNEWS)