CEBU, Philippines — Patay ang usa ka 40 anyos nga truck boy human aksidente kining naligsan sa usa ka dump truck dihang nilabang sa may National Highway, Barangay Poblacion Dalaguete Cebu, Lunes sa buntag.
Ang namatay naila nga si Rodel Casiong, truck boy employee, residente sa Barangay Sangi, Highway, Lungsod sa Minglanilla.
Samtang ang nakaligis mao si Jerney Rosalita, 29 anyos, ulitawo, taga barangay Poog, Dakbayan sa Toledo.
Matud pa ni Police Master Sergeant Arnold Frinal, Desk Officer sa Dalaguete Police Station base sa initial nga imbestigasyon,giingong nagbyahe padulong sa habagatan si Rosalita, sa dihang pag-abot niya sa maong lugar aksidente niyang naligsan si Casiong.
Sumala pa ni Frinal, ang biktima nalatayan sa ligid sa dump truck sa dihang nilabang kini sa maong dalan.
Ang grabeng kadaut nga naangkon sa biktima maoy hinungdan sa iyang hinanaling kamatayon.
Ang driver nga nakaligis ang kasamtangan usa nga gitanggong samtang gipaabot ang pagpasang-at ug tukma nga kaso. —MEL (BANATNEWS)