CEBU, Philippines — Gibutyag sa pangulo sa City Disaster Risk Reduction and Management Office (CDRRMO) nga si Ramil Ayuman nga dili pa gihapon maagian ang steel bridge sa Barangay Pulangbato .
Kini tungod kay wa pa mahuman ang pag-trabaho niini ug mopalit pa ug mga materyales ang Department of Engineering and Public Works (DEPW) nga magamit alang sa pag-ayo sa maong taytayan.
Hinoun giklaro ni Ayuman nga paspasan gyud kini og trabaho sa kagamhanan.
Kahinumdoman nasuta nga dunay deperensya ang pipila ka bahin sa taytayan hinungdan nga delikado kaayo kini nga agian sa mga motorista.
Niadtong miaging semana gi-kordonan na kini sa CDRRMO human masuta nga gitaya na kini og maayo ug dunay mga lungag og delikado na nga mahunlak.
Nakig-alayon na usab ang Special Rescue Squad (SRS) ngadto ni Pulangbato Barangay Captain Marlene Macua.
Gikataho usab nga mohimo og diversion road ang barangay alang sa temporaryo nga agi-anan.
“It was noted to be heavily damaged and pose a danger to heavy vehicles that may cross the steel bridge. To prevent it from collapsing, SRS personnel cordoned the steel bridge and only motorcycles are allowed to cross while waiting for the city engineering office to begin retrofitting procedures,”tipik sa pamahayag sa CDRRMO. MEL (BANATNEWS)