Cebu, Philippines — Nasakmit sa mga awtoridad ang kantidad og P1.76 milyones nga drugas samtang tulo ka high-value individuals ang nasikop sa duha ka managlahing buy-bust operations sa Dakbayan sa Sugbo niadtong Biyernes sa gabii.
Si Joseph Hernandez, 35, nakuhaan og 145 gramos nga shabu nga gibanabana nga balor og P986,000 sa buy-bust operation sa may Buhisan Road, Barangay Punta Princesa.
Ang mga ebidensya nga nakuha gikan kay Hernandez naglakip sa 14 kabuok medium nga pakete ug tulo ka dagkung putos sa shabu ug ubang kagamitan sa pagsuyop sa ginadiling drugas.
Samtang si Honey Grace Batad, 24, ug Abraham Hartman, 29, nakuhaan og 115 gramos nga shabu nga gibanabanang mobalor og P782,000 atol sa buy-bust operation sa Sitio Fatima, Barangay Apas .
Ang tulo ka dinakpan giisip nga mga HVI regional level.
Mag-atubang sila og kasong kalapasan sa Section 5 ug Section 11 sa Article II sa Republic Act 9165. (BANAT NEWS)