Gwen mohalad og sayaw sa Sinulog
CEBU, Philippines — Mohalad gihapon og sayaw si Gobernador Gwendolyn Garcia alang kang Señor Santo Niño ugmang adlawa. Kini bisan pa man og kanselado ang Sinulog Festival 2021 tungod sa padayong hulga sa Covid-19.
“I feel like it is my moral duty to still give homage to the Sto Niño who has blessed the province so much and on a personal note, he too, has blessed mi so much, protecting me against all false charges and accusations, vindicating my name and my family’s name,” matud ni Garcia.
Si Garcia ubanan kini og mga dancers nga dili moabot og 10 apil na ang usa o duha ka bokal.
Walay live audience atol sa pagsayaw aron masubay ang social distancing protocol.
Gihulagway sa gobernador nga “dance of homage and thanksgiving” ang iyang sayaw nga ang choreographer mao si Victor Cuenco.
Sukad 2005 hangtud 2013 ug 2020, si Garcia nisayaw matag Sinulog samtang naglingkod isip gobernador isip panaad ngadto sa Balaang Bata.
Lingaw gihapon
Samtang gipasalig ni Cebu City Vice Mayor Michael Rama lingaw gihapon ang pasundayag sa Sinulog Festival online ugmang adlawa.
Masaksihan ugma ang mga pasundayag sa mga kampeyon sa nilabay nga mga tuig sugod sa 1982.
Sugdan kini sa alas 9 sa buntag pinaagi sa Santos nga Misa nga dumalahon ni Msgr. Boy Alesna nga himoon sa Fort San Pedro ug tambungan sa mga opisyal sa Siyudad sa Sugbo. Human sa misa, isunod dayon ang virtual presentations nga pulos lang halad ug walay kompetisyon.
Sumala pa ni Neil Odchigue, sakop sa executive committee sa Sinulog 2021, nga may pasundayag sab gikan sa gawas sa nasud nga makita online.
Ang virtual Sinulog Festival mahuman sa alas 7 sa gabii ug ipakita sab ang file video sa niaging grand fireworks display.
Makita ang programa sa digital platforms sa Sinulog Foundation Inc. sama sa ilang Facebook page, Youtube ug website.
Party-party
Sa laing bahin, si Lapu-Lapu City Mayor Junard “Ahong” Chan dili mopugong sa mga parties ug kalihukan atol sa Fiesta Señor ugmang adlawa. Apan giklaro ni Chan nga ang mga organizers kinahanglan mokuha og special permit sa siyudad ug mosunod sa mga protocols.
Nagtuo ang mayor nga aduna gyuy mga organizers ang mobalhin sa iyang siyudad ilabi na kanselado ang mga kalihukan sa Dakbayan sa Sugbo may kalabutan sa Sinulog Festival. —Sanden J. Anadia, Rowena D. Capistrano/GMR (BANATNEWS)
- Latest
