CEBU, Philippines — Si Cebu City Councilor James Anthony Cuenco, chairman sa Cebu City Jeepney Task Force nagkanayon nga sa kataposang bahin niining buwana si Mayor Edgardo Labella mopagawas og executive order aron tugotan ang mga Traditional Public Utility Jeepneys gikan sa laing lugar sama sa Mandaue, Talisay ug Lapu-Lapu nga makasulod sa Cebu City.
Matud ni Cuenco nga 50 porsyento sa maong mga traditional jeepney nga aduna nay rota kaniadto sa Cebu City sa wala pa ang pandemiya maoy tugotan nga makasulod sa siyudad.
Giklaro ni Cuenco nga kadtong mga mosulod sa siyudad kinahanglang moagi usab kini sa proseso nga giagian sa mga drayber ug operators dinhi sa Cebu City sama sa swab test ingon man ang pagkuha og permit.
Nasayran nga usa ka buwan na sukad nga gipabalik og dagan ang mga traditional jeepney dinhi sa Cebu City ug 85 persyento niini nituman gyud sa mga palisiya nga gipagawas sa Cebu City Government.
Apan giangkon ni Cuenco nga adunay mga insidente diha sa Talamban nga kon mogabii na magsikit na ang mga sakay ug aduna nay bangko diha sa tunga nga bahin sa jeep alang sa dugang pasahero hinungdan nga gipadalhan og traffic enforcer diha sa lugar aron kini mabadlong.
“Para badlungon to sila, that was the major incident that we recorded, so far mao pa”, matud ni Cuenco. —/BDB (BANATNEWS)