CEBU, Philippines — Si Cebu City Councilor Nestor Archival nisugyot og ordinansahon nga nagmando mga pet owner sa paglimpiyo o paghipos sa hugaw sa ilang mga binuhing mananap nga magpasad diha sa pampublikong lugar.
Matud ni Archival nga gawas sa kahasol adunay mga pagtuon nga naghatag usab og hulga sa panglawas sa mga tawo ang hugaw sa hayop.
Giingong nabantayan usab ni Archival nga adunay ubang tawo nga mosuroy kauban ang ilang mananap ug pasagdan lang nga mopagawas sa hugaw ang binuhing hayop hinungdan nga magpasad kini diha sa kadalanan, sidewalks ug gutter sa pampublikong lugar.
Si Archival nagkanayon nga responsibilidad sa pet owners ang paghipos sa hugaw sa ilang mga binuhi nga hayop.
Base sa nahisgutang ordinansahon nga ang makasupak niini makamulta og P1,000 sa unang kalapasan , P3,000 alang sa ikaduhang offense, P4,000 sa ikatulong kalapasan, P5,000 sa sunod pa nga mga kalapasan.
Sa higayon nga mapalabang ang maong ordinansahon ang Cebu City Health Department ug Department of Veterinary Medicine and Fisheries maoy mangulo sa implementasyon niini.
Gitahasan usab nga motabang sa implementasyon ang Cebu City Transportation Office (CCTO), Cebu Environmental Sanitation and Enforcement Team (CESET) ug ang mga barangay deputized personnel. –BDB (BANATNEWS)