CEBU, Philippines — Ang kapolisan sa Lapu-Lapu City Police Office (LCPO) naghimo og imbestigasyon bahin sa nikatap nga video sa usa ka party nga giingong nahitabo atol sa pagsaulog sa pista sa Birhen sa Regla.
Ang pagpahigayon og party wala gidili kun ang pamilya lang nga nagpuyo sa us aka balay ang naglingaw-lingaw.
Apan kun kini buhaton unya dunay mga bisitang dayo kalapasan na kini sa Executive Order ni Mayor Junard Chan nga nagdili sa pagdapit og mga bisita gikan sa gawas panahon pista tungod sa hulga sa coronavirus.
Si LCPO director Police Colonel Arnel Banzon miingon nga naghimo na sila og imbestigasyon alang sa posibleng pagpasaka og kaso batok sa mga nagpasiugda sa maong kalihokan.
Ang gi-post nga video nagpakita nga dunay nagtukar nga live band ug makita usab ang grupo sa mga tawo nga malipayon kaayo sa ilang pagsayaw.
"From there, siguro we will be preparing appropriate charges sa ilaha if makita nga naay kalapasan," nagkanayon si Banzon.
Giingong ang maong video kuha gikan sa usa ka balay sa Barangay Pajo diin nahimong barangay kapitan si Ahong kaniadto.— IBM (BANAT NEWS)