CEBU, Philippines — Gitinuod sa syudad ang pasidaan nga higpitan pagusab ang pagpatuman sa quarantine protocols sa siyudad. Tungod niini nasampolan ang 136 ka mga quarantine violators sa Dakbayan sa Sugbo.
Ang maong operasyon mao ang gilusad nga Oplan Bulabog, nga diin ang Cebu City Police Office mangusog na sa pagpanakop niadtong mga quarantine violators.
Ang mga dinakpan gikan kini sa nagkadaiyang police stations nga ilang gidakop. Gi-turnover sila sa Plaza Independencia human gi-activate ang COVID Action Team nga gipangulohan sa pangulo sa Prevention Restoration Orderly Beautification Enhancement, Raquel Bohol-Arce.
Matud pa ni Arce, ang mga gisikop nakalapas sa minimum health protocols sama sa wala pagsuot og facemask, social distancing, way quarantine passes ug curfew.
Ang 56 nakabayad og multa nga tag P500 samtang ang uban nga way ikabayad gipa-community service nga walo ka oras.
Gitug-an ni Arce, kung adunay madakpan nga dili momulta ug dili mo community service ibutang kini sa police station diin sila nadakpan hangtod makabayad.
Sugarol
Gidemalas ang 41 ka mga sugarol sa tigbakay sa miaging Biyernes sa hapon 13 sa Nobiyembre 2020 dihang kalit nga gironda sa kapolisan nga maoy hinungdan sa ilang pagkabalhog sa bilanggoan.
Si Police Lieutenant Colonel Randy Korret, pangulo sa Provincial Intelligence Unit (PIU) sa Cebu Provincial Police Office (CPPO) miingon nga dunay misumbong kanila bahin sa tigbakay sa Barangay Libjo sa Lungsod sa Tabogon.
Sa pagabot sa kapolisan, nadakpan ang 41 ka mga sugarol, upat ka mga manok hiniktan nga ang duha mga bihag ug ang pusta nga P2,700 nga salapi.— Romeo T. Limpangog/IBM (BANATNEWS)