CEBU, Philippines — Ang Cordova Lapu-Lapu Metro Cebu Transport Cooperative (CLMC) mopakatap og 20 ka units ngadto sa duha ka rota sa Dakbayan sa Sugbo sugod karong Lunes.
Samtang dugang 600 ka units ang gipaabot nga ilang mapalit og mapadagan sa Probinsiya sa Sugbo.
Suma pa ni Hendry Fritz Co, chairperson sa CLMC atol sa ilang launching nga initial pa lang ang 20 ka units, diin 10 ka units ang padaganon sa Urgello-Parkmal nga rota ug laing 10 sa Bulacao-SM nga rota.
Gidugang ni Co, sa ikatulong semana sa buwan sa Nobyiembre ilang gipaabot nga moabot ang dugang 50 ka units gikan sa China.
Sa 50 ka units, 20 niini ang mobyahe sa Consolacion-Cebu City nga rota ug 10 ka units matag rota sa Mabolo-Carbon, Danao City-Cebu City ug Liloan-SM City Cebu.
“Kaning 20 units nga i launch kay sa CLMC na gyud ni. But initially, 236 units ni among i operate but nagpaabot pa mi sa banko pag release sa amoang loan,” segun pa ni Co.
Ang CLMC sa pagkakaron dunay 300 ka myembro ug kaniadto miabot sila og 600 ka traditional jeepneys. The Freeman/MEL