CEBU, Philippines — Nanawagan ang Cebu City Transportation Office (CCTO) ngadto sa opisyales sa barangay nga unta motabang usab sila sa pagpatuman sa kahapsay sa kadalanan pinaagi sa pagbadlongon sa mga tawo nga magpataka og parada sa ilang mga sakyanan.
Matud ni John Paul Amores, tigpamaba sa CCTO nga importante kaayo ang paghawan sa kadalanan aron malikayan ang paghuot sa trapiko ug hapsay usab ang pag-agi sa emergency vehicles panahon kong adunay emerhensiya.
Sa laing bahin, adunay 7,781 ka traffic violators ang natala sa unang bahin niining buwan sa Oktubre ug naka-impound usab sila of 323 ka motorsiklo.
Kasagaran nga kalapasan naglangkub sa no right turn on red signal, no stopping, nagpataka og parking, nagsul-ob og tsinelas samtang nagmaneho, walay delivery permit, no canvass cover, expired ang rehistro sa sakyanan, expired ang lisensiya ug expired and TOP.
Ang CCTO alerto usab karon diha sa nagkadaiyang sementeryo aron masiguro ang pagpatuman sa kahapsay sa dagan sa trapiko. /BDB (BANATNEWS)