CEBU, Philippines — Usa ka patay’ng lawas nga gituohang iyaha sa babaye nga walay ulo, kamot ug tiil ang nakit-an sulod sa usa ka garbage bag sa sapa sa Sitio Kalubihan, sa Barangay Talamban ning Dakbayan sa Sugbo kagahpon sa udto sa adlaw nga Sabado.
Ang lawas nakit-an sa residente sa maong dapit nga padung unta mamasol og isda matud pa ni Police Captajin Jonathan Taneo, hepe sa Talamban Police Station. Sumala pa nga nabantayan nila ang itom nga plastic bag nga gidugokan og langaw maong ilaha kining gihiling ug didto nakita nila ang lawas.
Sumala pa ni Taneo, ang lawas sa gituohan nga babaye anaa na sa state of decomposition ug gituohan pipila na kini ka adlaw nga gipatay. Ang lawas ipaubos pa sa otopsiya.
Dugang pa ni Taneo, dili pa hinoon nila matumbok kung grupo ba o usa lang ka tawo ang nihimo sa maong krimen.
Apan dako ang pagtuo sa kapulisan nga dili lang usa ka tawo ang nihimo sa krimen base sa pamaagi sa paghipos niini.
Padayon karon nga nihimo pagsusi ang kapulisan sa Talamban sa posibleng nahimutangan sa nawala nga uban nga parte sa lawas sa maong babaye ug nanawagan sa publiko kun kinsa kanila ang nawad-an og miyembro sa pamilya sa pagdangop diha sa ilang buhatan. /IBM (BANATNEWS)