CEBU, Philippines — Ang kapolisan sa Dakbayan sa Mandaue mosugyot sa kagamhanan sa siyudad nga walay tugotang makatinda og mga buwak ug kandila diha duol sa sementeryo atol sa mga adlaw nga gitugot ang pagbisita sa katawhan sa lubong sa ilang mga mahal sa kinabuhi.
Si Police Colonel Jonathan Abella, director sa Mandaue City Police Office (MCPO) nibutyag nga dugang nilang isugyot nga hatagan lang og 20 minutos ang mga tawo nga mosulod sa sementeryo pagsiguro nga dili maghuot ug masunod ang safety health protocols sa paglikay sa COVID-19.
Si Carla Piratir, manindahay og kandila ug mga buwak diha sa St. Joseph Cemetery sa Barangay Guizo sa maong siyudad nipadayag sa iyang pagsupak sa tinguha sa kapolisan.
Matud ni Piratir nga sa maong mga adlaw lang kusog ang ilang halin nga ihikaw kanila.
Gipaniguro sa mga vendor nga tumanon nila ang health protocols tungod kay sila dili usab buot mataptan sa virus.
Samtang si Abella nagkanayon nga higpit nga nagbantay ang kapolisan sa mga sementeryo sa dakbayan ug giabagan usab kini sa mga barangay tanod. Subay niini, si Atty. Liser Malate, hepe sa emergency operation center nagkanayon nga pisibleng tugotan ang mga vendor apan kinahanglang masiguro nga masunod ang minimum standard sa health protocols.
Sa nasayran, base sa giluwatan nga executive order ni Mayor Jonas Cortes ang pribado nga sementeryo o gidumala sa simbahang Katoliko gitugotan lang kining mobukas sa Oktubre 15 hangtud sa Oktubre 28 ug isirardo kini sa Nobyimbre 1 hangtud sa Nobyimbre 4 ug mobalik kini sa pagbukas sa Nobiyembre 5 hangtud sa Nobiyembre 15, 2020. /BDB (BANATNEWS)