CEBU, Philippines — Duha ka tawo ang patay atol sa nahitabong pagpabaha sa Dakbayan sa Sugbo tungod sa kusog nga bunok sa uwan niadtong Martes sa gabii.
Kini maoy gipahibawo ni Ramil Ayuman, officer-in-charge sa Cebu City Disaster Risk Reduction Management Office (CCDRRMO).
Ang nakalas mao si Labiano Detuya, 85, residente sa Sitio Creekside, Barangay Lorega San Miguel giingong dihang nibaha naa na sa ikaduhang andana sa ilang balay apan nikanaog kini ug gituohang nadakin-as ug napakong ang ulo hinungdan nga nawagtangan sa panimuot ug nalumos.
Laing nakalas mao si Leonardo Kaka Otto, 49, residente sa Sitio Tarcom, Barangay Busay, nag-viral ang video sa maong lalaki nga gituohang nakainom nga milabang sa spillway ug natumba hinungdan nga nadala kini sa kakusog sa bul-og sa tubig.
Ang patayng lawas ni Otto napalgan diha sa Upper Laguerta, Barangay Lahug kagahapon sa alas 7:00 sa buntag.
Gawas sa duha nga nakalas na-missing si Hansel Dayundon, 16-anyos kinsa naanod sa baha ug sa oras sa pagsuwat niining balita nagpadayon pa ang search and retrieval operation sa kagamhanan sa siyudad, Philippine Coast Guard ug Bureau of Fire Protection.
Giingong si Dayundon usa ka libudsuroy ug anha magkatulganan dapit sa taytay sa General Maxilom Avenue diin diha usab sa maong dapit kini naanod sa baha.
Base sa pasiunang talaan sa CCDRRMO ang mga lugar nga gibahaan naglangkub sa Kamputhaw, Apas, Pulangbato, Talamban, Zapatera, T. Padilla, Lahug, Lorega ug Bacayan.
Kagahapon ang mga sakop sa Department of Public Service, Quick Response Team, Department of Engineering and Public Works (DEPW), kabomberohan ug uban pa ang nanglimpiyo diha sa General Maxilom Avenue diin grabe ang lapok ug mga basura nga nagtipun-og.
Si Cebu City Mayor Edgardo Labella nagpatawag og emergency meeting sa mga office ug department head nga hingtungdan ug gituki ang insidente niadtong Martes.
Ang Chairman sa Committee on Infrastructure Konsehal Jerry Guardo nagkanayon nga wala napanglantawan ang nahitabo niadtong Martes diin mao kadto ang labing unang higayon nga ang uptown area nakasinati og baha.
Sa nahisgutang tigom kagahapon sa buntag gituki ang short term ug long term solution.
Si Guardo nagkanayhon nga ang pagpatuman sa 3-meter easement sa kasapaan maoy usa sa iyang giduso nga proposal.
Samtang sa Dakbayan sa Talisay gibaha usab ang pipila ka mga lugar sa Dakbayan sa Talisay.
Si Gary Togonon, pangulo sa Aksyon Agad Team nagkanayon nga matag bunok sa kusog nga uwan mangandam sila sa pagresponde sa mga lugar nga bahaan.
Una nilang girespondehan mao ang karsada sa Barangay Bulacao lahos na sa Barangay Tabunok.
Human sa nahisgutang mga barangay nisaka usab ang tubig diha sa Barangay Linao.
Matud ni Togonon nga wala magdugay ang baha human nila nahawan ang mga basura diha sa kanal.
Adunay dakong kahoy ang natumba diha sa Barangay Mohon tungod sa pagkahumok sa yuta.
Sa laing bahin, Si Al Quiblat hepe sa Philippine Atmospheric Geophysical and Astronomical Services Administration nagkanayon nga nakatala sila og 405 mil ka drum nga tubig per square meter sulod sa usa ka oras ug tunga nga pag-ulan sa Dakbayan sa Sugbo.
Matud ni Quiblat nga ang gidaghanon sa maong uwan tungod sa tropical depression Ofel ug lakip usab sa habagat. — Rowena D. Capistrano, Sanden J. Anadia ug Gabriel C. Bonjoc/BDB (BANAT NEWS)