CEBU, Philippines — Ang mga barangay opisyales sa Barangay Paknaan ug Labogon Mandaue City gikatakdang modeklarar og state of calamity karong adlawa human sa pag-ulbo sa sunog niadtong Biyernes sa gabii nga niugdaw ug dili mominos sa 30 ka panimalay.
Si Kapitan Malak Soco makigtagbo sa konseho sa barangay karong adlawa aron tukion kun duna pa silay magamit nga calamity fund ug alang sab sa pagdeklarar og state of calamity.
Dili magamit ang calamity fund kun way resolusyon gikan sa konseho nga ubos sa state of calamity ang barangay o ang apektadong sitio.
Samtang si Barangay Captain Amado Manatad, sa Barangay Labogon nitug-an magtagbo usab siya sa iyang konseho sa samang rason.
Dugang pa ni Manatad, nangita usa sila ug mga pamaagi aron makahatag ug initial nga ayuda sa ilang katawhan ilabi na walay mga bukas nga mga bangko.
Kung mahinumduman ang maong sunog nakaapektar sa dili mominos sa 75 ka pamilya o 300 ka mga individual. Padayon pa karon ang gihimo nga imbestigasyon sa kabomberohan may kalabutan sa maong sunog. /IBM (BANATNEWS)