Cebu, Philippines — Duha ang naangol ug 25 ka balay ang hingpit nga naugdaw human sa nahitabong sunog diha sa Sitio Latasan, Barangay Labogon, Dakbayan sa Mandaue niadtong Biyernes sa gabii.
Si Senior Fire Office One Noel Codilla, imbestigador sa Mandaue City Fire Department niila sa mga biktima nga sila si Mea Tampus, 29-anyos, nakabaton kini og second degree burn sa tuong bukton ug Leodegario Pareja Jr., 36, nakabton usab og second degree burn sa walang bukton.
Ang kayo sa sunog gikatahong nagsugod sa panimalay ni Regan Sacay diin ang kambomberohan nipahigayon pa og imbestigasyon sa hinungdan niini.
Ang maong sunog gipaubos kini sa 3rd alarm diin nadawat sa kabomberohan ang alarma alas 6:01 sa gabii ug hingpit nga napawong ang kayo alas 6:59 sa gabii.
Gibana-banang nikabat ngadto sa P220 mil ang danyos sa maong sunog. (BANAT NEWS)