CEBU, Philippines — Padayon gihapon nga wala pa makabalik sa pagpamasahero ang Public Utility Jeepney (PUJ) nga adunay rota sa Siyudad sa Sugbo.
Hinuon aduna nay pipila nga nagbiyahian sa habagatan ang nakapamasahero na og balik.
Si Jonathan Tumulak, hepe sa City of Talisay-Traffic Operations and Development Authority (CT-TODA) nagkanayon nga hinay-hinay na nga nakabalik sa ilang pamasada ang nagrota sa Minglanilla, Naga, San Fernando ug Carcar.
Apan kadto lang kining nakakuha og permit gikan sa Land Transportation Franchising and Regulatory Board (LTFRB).
Ang mga PUJ nga nakabiyahe gibutangan kini og divider aron matuman ang mga health protocol.
Kagahapon, ang Beep sa Persano Corporation maoy nakabalik na sa ilang pagpamasahero diin makalahos kini ngadto sa Siyudad sa Sugbo.
Ang Beep anha magpaabot og pasahero sa Alturas Terminal sa Barangay Tabunok gikan sa alas 6:00 sa buntag hangtud sa alas 6:00 sa gabii.
Gihangyo ni Tumulak ang mga sumasakay nga dili kalimtan ang pagsul-ob og facemask ug face shield. /BDB (BANATNEWS)