PUJ drivers naglaom nga makabalik sa pagpamasahero

CEBU, Philippines — Wala pa kawad-i og paglaom ang mga drayber sa Public Utility Jeepney (PUJ) nga nagbiyahe sa amihanang bahin sa Lalawigan sa Sugbo nga naglakip sa Dakbayan sa Danao,  Compostela, Liloan, Consolacion ug Dakbayansa Mandaue nga makabalik sa ilang pagbiyahe.

Gipadayag kini ni Pedro Amante,  47-anyos, minyo, adunay tulo ka anak, taga Lungsod sa Consolacion ug drayber sa PUJ nga nagbiyahe-an sa Consolacion ug Dakbayan sa Sugbo kinsa nangangkong wala  magpasakop og kahugpongan sa mga drayber sa PUJ.

Matud ni Amante nga  sa pagkakaron nga gidili pa ang pagpamasada nila nitabang lang una siya sa iyang asawa sa pagtinda og utanon.

Gibutyag ni Amante nga ang kitaon nila sa matag adlaw nga pagpaninda dili paigo sa ilang panginahanglan hinungdan nga padayon siya nga naglaom nga makabalik sa pagpamasahero.

Ang mga opisyal sa nagkalainlaing kahugpongan sa mga drayber sa pagpakigkita nila kang Kongresista Emmarie “Lollypop” Ouano-Dizon ilang gipadayag nga naglaom sila nga makabalik pa sa ilang pagpamasahero.

Lakip sa nahisgutang grupo nga nakigkita kang Dizon ang mga sakop sa Pinagkaisang Samahan Ng Tsuper at Operators Nationwide (PISTON).

Si Dizon niawhag sa 150 ka drayber gikan sa Dakbayan sa Mandaue ug 30 sa Lungsod sa Cordova nga magpailob lang una tungod kay ang administrasyon ni Presidente Rodrigo Duterte nangita kini og pamaagi sa panginabuhian nga mahatag ngadto sa mga kabus.

Sa maong panagtagbo si Dizon nihatag og ayuda ngadto sa mga drayber nga gilangkuban sa bugas ug mga delata. /BDB (BANATNEWS)