CEBU, Philippines — Gisugdan na kagahapon ang pagpanghatag og hinabang sa mga senior citizen sa Cebu City south district kinsa wala makadawa niadtong mga buwan sa Marso, Abril ug Mayo.
Ang pagpanghatag sa hinabang gipahigayon diha sa Cebu Coliseum diin molanat kini og tulo ka adlaw, gikan sa Agosto 29 hangtud sa Agosto 31, 2020.
Si Mayor Edgardo Labella nagkanayon nga kadtong otorisado nga representante lang sa senior citizen ang pwedeng mokuha sa financial assistance.
Sa pagkakaron ang mga senior citizen dili pa gihapon pwedeng makagawas tungod kay nagpadayon ang curfew alang sa mga senior citizens ug sa mga batan-on nga nagpangedaron og 20-anyos paubos.
Gipahibawo usab sa kagamhanan sa siyudad nga ang mga senior citizen sa north district nga wala makakuha sa ilahang financial assistance sa buwan sa Marso, Abril ug Mayo mahimong makakuha sa ilahang ayuda karong Septiyembre 1 ug 2, 2020 diha gihapon sa Cebu Coliseum.
Sa umaabot Sabado gikatakda usab ang paghatag sa siyudad sa hinabang sa senior citizen sa buwan sa mga Hunyo, Hulyo ug Agosto. /BDB (BANATNEWS)