CEBU, Philippines — Ang kagamhanan sa Dakbayan sa Sugbo naalarma sa advisory sa Department of Health kabahin sa peke nga contact tracers.
Si Konsehal Joel Garganera, deputy chief implementer sa Inter-Agency Task Force (IATF) Emergency Operations Center (EOC) sa Cebu City nibutyag nga naabot sa ilang atensiyon ang maong advisory ilabi na nga ang siyudad adunay kapin sa 100 ka contact tracer. Matud ni Garganera nga ang contact tracing teams kon mobisita kini og balay magpaila gyud kini sa iyang kaugalingon ug kasagaran kanila adunay kaubang polis.
Bisan og walay uniporme pweding mapakita sa contact tracer ang iyang identification card ug ang ubang job order sa city hall miyembro usab sa contact tracing team. Pahinumdom ni Garganera sa katawhan nga kon adunay mobisita sa ilang mga panimalay nga dili makapakita og identification card i-report dayon kini sa barangay. Ang tanang contact tracers makig-alayon kini sa barangay ilabi na sa buhatan sa Barangay Health Emergency Response Team (BHERT).
Sa laing bahin, nagpadayon na karon ang pagbansaybansay sa unang grupo sa mga nadawat nga contact tracers sa Dakbayan sa Mandaue.
Sa post sa facebook page sa public information office (PIO) sa siyudad nasayran nga ang maong kalihokan gipangulohan ni Atty. Julius Entise kinsa kanhi infection control nurse sa wala pa kini mahimo nga abogado.— /BDB (BANAT NEWS)