CEBU, Philippines — Kabomberohan sa Dakbayan sa Sugbo nihimo og mahinungdanon nga kalihukan agi og pagyukbo sa mga bombero nga nakalas sa nahitabong pag-ulbo didto sa Beirut Lebanon.
Ang maong initiative gipangulohan sa hepe sa Cebu City Fire Department Chief Inspector Josephus Alburo.
Sa nasayran adunay napulo ka mga sakop sa bombero ang nakalas tungod sa maong pag-ulbo hinungdan nga gihimo ang kalihukan nga ilang gitawag ug A day to our Fallen Heroes.
Gipakita sa mga sakop sa kabomberohan sa dakbayan uban sa mga fire volunteers sa kabarangayan nga bisan ug anaa sila sa layo nga bahin sa kalibutan nibati gihapon sila sa kaguol ug lakip usab sila sa nagbangutan.
Usa ka pag-ampo ug pagsaludar lakip ang dungan nga pagpatingog sa tanang mga siren diha sa Parian Fire Stations ang gihimo sa mga sakop sa Cebu City Fire Department ug mga volunteers.
Ang maong kalihukan maoy labing una nga gihimo dinhi sa Pilipinas nga naghatag ug pasidungog sa mga sakop sa kabomberohan nga nakalas.
Matud pa ni Senior Fire Officer 2 Wendell Villanueva, tigpamaba sa Cebu City Fire Department, ilakip usab unya sa pagsita sa kabomberohan atol sa ilang pag-inspection kung ugaling adunay mga stocks nga susama ug kemikal nga maoy hinungdan unya sa explosion. /MEL (BANATNEWS)