Kapolisan sa talisay ug Mandaue nakadawat og pasidungog
CEBU, Philippines — Giila nga “best component city police station” sa tibuok rehiyon-7 ang Dakbayan sa Talisay.
Ang Police Regional Office (PRO-7) maoy nipili niini atol sa ilang kasaulogan sa police service anniversary.
Si Police Major Gerard Ace Pelare, pangu sa Talisay City Police Station nibutyag nga dako niya nga kalipay human natagad ang ilang paningkamot.
Siya nagkanayon nga dili iya tanan ang pasidungog tungod kay naa usab ang iyang mga sakop nga nigahin sa ilang kinabuhi ug oras aron lang makahatag og saktong serbisyo.
Kahinumduman halos tanang sakop sa Talisay City Police Station ang gihulipan og bag-ong mga sakop gumikan sa daghang kontrobersiya ilabi na nga nangusog ang gobyerno sa paggukod sa mga tawo nga nalambigit sa ginadiling drugas.
Si mayor Gerald Anthony “Samsam” Gullas Jr. nipaabot og pagdayeg ngadto sa kapulisan ug siya miingon nga syento porsyento ang iyang pag-abag sa kapolisan sa syudad.
Pasidungog sa Mandaue police
Samtang sa laing pasidungog ang kapolisan sa Mandaue City Police Office (MCPO) nakadawat usab og upat ka special award atol sa culminating ceremony sa ika 119th Founding Anniversary sa Philippine National Police (PNP) nga gihimo niadtong Agosto 6, 2020.
Ang MCPO giila isip Best City Police Office sa Central Visayas, samtang giila usab isip Best City Mobile Force Company.
Si Police Colonel Jonathan Abella nga maoy hepe sa MCPO ang giila usab isip Best Senior Police Commissioned Officer for Operations sa gipahigayon nga virtual recognition nga ubos sa pagpasiugda sa Police Regional Office in Central Visayas sa PRO-7.
Samtang ang civilian personnel sa MCPO nga si Jose Tejano ang giila usab isip Best Non-Uniformed Personnel.
Nunot niini gipadayag ni Abella ang kahinangop sa naangkon nilang pasidungog gumikan sa ilang kalamposan pagtuman sa ilang kaakohan sa pagpatunhay sa kahapsay ug kalinaw sa dakbayan.
Dugang pa niya nga ang Best City Police Office recognition maoy usa sa labing paborito sa upat nga mga pasidungog nga ilang naangkon tungod kay pinaagi niini ilang ikapaambit ang kalampusan ngadto sa tanang opisyal sa dakbayan ug mga molopyo niini.
“Sa among achievement, tungod na sa tabang pud ni Mayor, mga barangay captains, nga dali masulbad ang atong mga problema diri sa Mandaue. Ang importante man gud ang support sa community. Kung walay support sa community, di gyud nato ma-achieve atoang accomplishments,” suma pa ni Abella. –Romeo T. Limpangog/MEL (BANATNEWS)
- Latest