CEBU, Philippines — Niabot sa 355 ang gidaghanon sa mga nakalapas sa quarantine protocols sulod lang sa usa ka adlaw sa pagpatuman sa general community quarantine sa Dakbayan sa Sugbo niadtong Sabado.
Matud ni Police Colonel Josefino Ligan, direktor sa Cebu City Police Office, nga 355,189 ang nakalapas sa paggawas nga wala’y quarantine pass, nakalapas sa curfew, walay face mask ug ubang kalapasan sa executive order ni Cebu City Mayor Edgar Labella.
Kadaghanan sa mga nakalapas ang mga nangadto sa malls hinungdan nga higpit sila karon nga nagbantay sa mga malls.
“There are reports that there are so many people in the malls yesterday, karon among ipa-validate to go inside the malls, mostly ang ma-violate dira sa malls is ang social distancing man gyud ug not wearing face mask,” sigun ni Ligan.
Sumala pa ni Ligan nga kadaghanan sa mga naaresto nagtuo nga ubos sa GCQ wala na’y gidili sa mga kalihukan ug nga ang tanan mahimo na nga makagawas bisan wala’y quarantine pass.
“When they were apprehended, they were disappointed kay abi nila GCQ na, pwede na sila kagawas, but no, we will have to sustain the gain sa atong nakuha for the past one month nga niminus atong active cases,” matud ni Ligan.
Tungod niini naghangyo si Ligan sa kooperasyon sa katawhan aron dili masayang ang mga pagminus sa active cases sa dakbayan niadtong mga niaging buwan samtang ang mandatory stay-at-home order magpadayon pa.
Dugang pa niya nga ang daghan nga nasikop magsilbi nga usa ka pasidaan nga ang mga enforcers higpit nga nagpatuman sa mga protocol sa quarantine.
Ang uban sa mga naaresto gi-turn over sa PROBE Team sa siyudad samtang ang pipila ipailawom sa regular filing. “Regular filing gyud to sila labi na tong mga gapabalik-balik nalang especially these (violators) of no quarantine passes and curfew kay if we compare this to the third and last week of July, mas nisaka ang atoang first week of July, and this one, one day only 355 na ang violators?” sumala pa ni Ligan.
Dugang ni Ligan nga sa higayon nga mapagawas na ang ordinansa sa siyudad, mas bug-at ang silot nga naglakip sa lima ka adlaw nga pagkapriso ug multa hangtud sa P2,000 ug hayan makontrol na ang mga tawo nga mogawas. /GMR (BANATNEWS)