CEBU, Philippines — Moabot na sa dul-an 5,000 ang total recoveries sa Cebu City sa coronavirus disease 2019.
Sa datos sa Department of Health 7 niadtong Domingo sa gabii, ang siyudad adunay total recoveries nga 4,914.
Makita sab sa maong datos ang tanang kaso sa siyudad anaa sa 8,739 diin 3,360 niini active cases samtang ang tanang namatay moabot na sa 465. Samtang nakagawas na sa Cebu City Quarantine Center ang 25 ka pasyente nga nakarekober sa COVID-19 nga maoy ika-unom nga batch sa mga recoveries nga nakagawas sa maong pasilidad niadtong Biyernes.
Lakip sa nakagawas na sa maong quarantine facility ang 80-anyos nga medical frontliner.
Ang chief quarantine director sa CCQC, Dr. Ryan Cabahug, niawhag sa mga nakarekober sa COVID-19 sa pagpadayon sa pagsunod sa health protocols ug dili mokompiyansa sa maong virus.
Si Cebu City Medical Center Administrator Yvonne Cania niawhag sab sa mga nakarekober sa pagpa-ambit sa ilang kasinatin sulod sa CCQC kun giunsa sila sa pag-atiman sa maong pasilidad. Ang mga nipaubos sa quarantine sa CCQC giatiman sa mga doktor ug ubang medical frontliners aron mawagtang ang virus sa lawas pinaagi sa pagpakusog sa ilang immune system. —/GMR (BANATNEWS)