CEBU, Philippines — Tugutan na nga makaangkas sa motorsiklo ang magtiayon sugod karong adlawa sa mga lugar nga ubos sa general community quarantine (GCQ) ug modified general community quarantine.
Kini ang gipahibawo ni Department of Interior and Local Government Secretary Eduardo Año.
Ang gamiton nga disenyo sa motorsiklo mao ang giduso ni Gob. Arthur Yap sa Bohol diin dunay ali taliwala sa drayber ug sa angkas niini.
Apan padayon nga ipatuman sa Cebu City Police Office (CCPO) ang “no back ride policy” tungod kay ang Dakbayan sa Sugbo ubos pa man sa enhanced community quarantine (ECQ).
Nunot niini gihangyo ni CCPO Director Josefino Ligan ang publiko nga mosunod lang una sa lagda sa ECQ kung buot nga mabalik na ang pagpaangkas sa ilang kabanay sa mga motorsiklo.
Base sa guidelines nga gipagawas ang DILG ug Inter-Agency Task Force nga mamahimo na nga makaangkas sa motorsiklo ang asawa.
Ang maong kamanduan gihangop sa katawhan ilabi na niadtong motorsiklo lang ang bugtong sakyanan.
Matud sa usa ka Dante Saranillo nga taga Cubacub, Dakbayan sa Mandaue nga maayo unta kung dili lang asawa apan lakip na ang mga anak tungod kay anaa ra man sila sa usa ka balay ug mag-uban gihapon sa pagpangaon ug sa bisan unsa nga kalihukan sulod sa balay.
Dugang pa ni Saranillo nga daku og tabang ang pagpasakay sa motorsiklo ilabi na karon nga wala pay pangpublikong sakyanan.
Pipila nipadayag nga makadaginot sila sa plite kung makahimo lang sila pagsakay sa ilang mga sakop sa pamilya sa motorsiklo ilabi na kadtong mga nagtrabaho adlaw-adlaw. Rowena D. Capistrano/GMR (BANATNEWS)