Dugang P1 milyones gikatakdang ipanghatag sa 80 ka barangay
CEBU, Philippines — Gikatakda karong adlawa ang pagpanghatag og dugang P1 milyon nga ayuda alang sa 80 ka barangay sa Dakbayan sa Sugbo gikan sa kagamhanan sa siyudad.
Kini maoy gibutyag ni Cebu City Mayor Edgardo Labella.
Sa niaging adlaw gipirmahan ni Atty. Floro Casas, city administrator ang dokumento aron i-release ang P1 milyon nga financial assistance alang sa 80 ka barangay sa siyudad.
Matud ni Labella nga mao na kini ang second tranche sa paghatag og financial assistance sa mga barangay diin ang first tranche mao ang P1 milyon ngadto na sa P3 mil nga hinabang pinansiyal sa mga barangay depende sa ilang populasyon nga gihatag niadtong buwan sa Abril niining tuiga.
Ang P1 milyon nga financial assistance 80 porsyento niini gamiton sa pagpalit og pagkaon ug ang 20 porsyento niini alang sa protective gears, vitamins ug uban pa.
Ang dugang P1 milyon nga ipanghatag ngadto sa mga barangay gikuha kini gikan sa 2020 budget sa siyudad.
Sa laing bahin, si Labella nagkanayon nga gitugyan na ngadto sa City Legal Office ang imbestigasyon kabahin sa giingong kasamok nga nahitabo sa pagpanghatag og bugas diin nakalapas kini sa health protocols.
“In due time we will be submitting a report on this issue, all of the alleged violations on the health protocols on different barangays they are being investigated by the city attorney’s office”, dugang ni Labella. /BDB (BANATNEWS)
- Latest
