CEBU, Philippines — Gihangop sa Police Regional Office 7 ang pagpirma ni Presidente Rodrigo Duterte sa Anti-Terrorismo Law nga gihulagway sa mga human rights advocates nga peligro para sa mga tawong mosaway sa gobiyerno kay mapasanginlan silang mga terorista.
Si Police Brigadier General Albert Ignatius Ferro miingon nga dako kini og matabang sa gobiyerno batok sa terorismo sa nasud ug dili magdala sa katawhan sa kaparutan.
Sumala pa niya mas mapanalipdan hinuon ang katawhan batok sa mga plano sa mga terorista sa pagpangatake sa dili pa nila kini malusad.
Ang maong balaod dunay mga probisyong maoy gikabalak-an sa mga supak niini nga magamit sa mga otoridad pag-abusar sama nalang sa pagtugot sa mga law enforcement units nga modakop sa mga gisuspetsahang terorista ug pagtanggong kanila bisan walay warrant ug kasong gipasaka sud sa 24 ka adlaw.
Apan si Ferro mipasalig nga adunay mga safety measures ang maong balaod nga dili kini mahimong maabuso sa mga otoridad.
Matud niya dili angay mahadlok kadtong walay koneksyon sa mga teroristang grupo. Bisan ang mga militanteng pundok t gitugotan man sa maong balaod nga maglusad sa ilang mga lihok protesta.
“Under the anti-terrorism law there is no such provision that will prohibit people from protesting , from going to the street and protest, wala man ana nga provision,” matud pa ni Ferro.
Hagit ni Ferro
Wala na hinuon siya mahibulong kun nganong dunay pipila ka militanteng pundok nga kusganong nisupak niini tungod kay nisuporta sila sa komunistang New People’s Army nga giisip sa gobiyerno nga usa ka teroristang grupo sa nasud.
“I will challenge them that to condemn the violence and other atrocities being committed by the New People’s Army to the strongest sense that these NPA’s atrocities, their arson activities, the burning and the killings of our soldiers in Negros Occidental lately. I will ask them to condemn all those activities and for sure I think they cannot do that,”hagit pa ni Ferro.
Panawagan niya sa mga sakop sa NPA nga naa sa kabukiran sa Negros ug ubang bahin sa Central Visayas nga panahon na nga motahan sa ilang kaugalingon tungod kay adunay nagpaabot kanila nga maayong kinabuhi.
Apan ang tigpamaba sa Bayan Central Visayas , Jaime Paglinawan nasagmuyo nga giuna pagatiman ang pagpasar sa maong balaod inay ang pandemiya nga giatubang karon sa nasud.
Samtang ang National Union of People’s Lawyer gikondinar sab sa pagpasar sa maong balaod kay matud nila kalapasan kini sa Batakang Balaod.
“The National Union of Peoples’ Lawyers (NUPL) Cebu, together with its law student arm, vehemently condemns the approval of President Rodrigo Roa Duterte to the Anti-Terrorism Act of 2020 on Friday, July 3, 2020, despite the massive and widespread calls to veto the law for its clear and blatant violations to the Constitution, existing laws, and prevailing jurisprudential doctrines.” Basi sa pamahayag ni Atty. King Anthony Perez tigpamababa sa NUPL. /IBM (BANATNEWS)