CEBU, Philippines — Gipaubos sa swab testing ang tanan nga personnel sa Cebu City Police Office gahapon sa buntag nonot sa gipatuman nga health protocols gumikan sa coronavirus disease.
Kini maoy gibutyag ni Cebu City Police Office CCPO Director Police Colonel Cedric Earl Tamayo.
Suma pa ni Tamayo nga ang maong lakang sa kapolisan gitumong aron pagsiguro nga naa sa maayo nga kahimtang sa panglawas ang mga polis nonot usab sa gipatuman nga lockdown sa duha ka buhatan sa CCPO.
Ang Regional Health Service (RHS-7) maoy nagmonitor sa kahimtang sa panglawas sa kapolisan.
Una niini mokabat sa 30 ka mga personnel sa CCPO ang nataptan sa coronavirus disease ug naghinaut si Tamayo nga dili na madugangan ang maong gidaghanon.
Ang maong mga polis nga nagpositibo sa COVID-19 kasamtangan nga gibutang sa isolation.
Hinoon una nang gipasalig ni Tamayo nga dili mabalda ang operasyon sa kapolisan bisan ug pipila sa ilang estasyon ang gipaubos sa lockdown. Kini tungod usab sa pag-abag sa augmentation force.
Sa kinatibuk-an adunay dul-an 2 mil ka polis ang CCPO lakip na ang bag-o nga 350 ka polis nga gi-augment sa dakbayan sa Sugbo. /MEL (BANATNEWS)