CEBU, Philippines — Miabot sa usa ka libo (1,000) ka mga tawo ang nadakpan nga nakalapas sa safety protocols sa Dakbayan sa Talisay matag buwan.
Kini base sa talaan sa kapulisan sa milabayng tulo na ka buwan sukad gipaubos sa community quarantine ang nasud nonot sa COVID-19 pandemic.
Si Police Major Gerard Ace Pelare, pangu sa Talisay City Police Station nibutyag nga ang mga nadakpan mao kadtong wala magdala og Quarantine Pass nga nigawas sa ilang panimay, wala magsul-ob og facemask, wala motuman sa physical distancing, curfew, pag inom sa pampublikong lugar ug uban pa.
Matud pa ni Pelare nga walay puas ang ilang pagpanakop sa mga tawo nga nagpabadlong hinungdan nga naabot sa maong gidaghanon ang nasikop.
Gani 16 ka random checkpoints sa matag adlaw ang ilang gipatuman aron makita ang presensya sa mga otoridad diha sa kadalanan.
Nagkanayon si Pelare nga ila kining gihimo aron makatabang nga dili na mokatap ang coronavirus disease ug gihangyo usab niya ang katawhan nga magpuyo na lang sa ilang pinuy-anan kun way importanteng katuyuan sa gawas. /MEL (BANATNEWS)