CEBU, Philippines — Gipusil patay ang usa ka lalaki samtang nagayo og suga diha sa Sitio Agus Gamay Barangay Agus Dakbayan sa Lapu-Lapu.
Matud ni Police Captain Aibert Jay Samson hepe sa Police Station 5 sa Lapu- Lapu City Police Office nga nagayo sa street lights si Daño uban ang laing tulo ka nga job order employees sa City Hall.
Dugang pa ni Samson nga samtang nag-ayo sa suga ang biktima adunay motor nga miagi sa ilang tungod ug gipuntariya sa pagpusil si Daño ug naigo kini sa kilid nga milapos sa iyang tiyan tulo ka higayon.
Nakuha sa crime scene ang tulo ka basiyo sa bala sa .45 kalibre pistola. Giingon riding in tandem nga nagtaptap sa mga nawong ang mga mamumuno nga daling nangikyas human sa ilang gibuhat.
Nakadagan matud pa ang biktima sa balay ni Virgilio Andrade aron pagpatabang apan namatay kini didto sa sulod. Wala pay lead ang kapolisan kun unsay motibo sa maong pagpamusil. /IBM (BANATNEWS)