CEBU, Philippines — Pinalahi sa naandan ang pamaagi sa pagtudlo nga giandam karon sa DepEd-Cebu City Schools Division sa pagbalik na sa klase sugod karong Agosto 24 nunot sa coronavirus pandemic nga nagdili sa face-to-face classes.
Sumala pa ni DepEd-Cebu City schools superintendent Rhea Mar Angtud sa The Freeman, igsuong pamantalaan sa Banat News, apil sa ilang giandam nga pamaagi mao ang distance learning nga adunay tulo ka klase —online, modular ug tv/radio-based instruction; ang blended learning nga kombinasyon sa physical classroom ug distance learning ug ang kataposan ang home-schooling.
Gikonsiders sab sa ubang mga rehiyon ang face-to-face classes apan kinahanglang gugot ang pagtuman nila sa physical distancing ug health standards.
“Daghan tag-scheme na gamiton.We are now training our teachers kung unsay pwede gamiton,” si Angtud miingon.
Daghang kapilian
Ang mga DepEd-supervisors kasamtangan na karong naghimo og mga modules nga gamiton sa ilang mga magtutudlo sa bag-ong pamaagi sa pagtudlo.
Samtang kadtong mga lugar nga wala pay access sa internet, makigalayon ang DepEd sa ilang mga barangay.
“Gitagaan nato ang schools og daghang platforms. Wala ta moingon nila nga kani gamita. Empowered ang principal to choose which among the platforms presented applicable nila,” dugang pang Angtud.
Ang maong mga pamaagi daw maoy tubag sa hangyo sa mga magtutudlo nga dili “structured” kondili customized nga pamaagi sa pagtudlo ang buhaton tungod kay sa structured learning system maproblema ang mga magtutudlo, ginikana ug mga tinun-an pagtuman niini.
“Sa Cebu City, daghan tag module where Alternative Learning system is concerned, “ dugang pa ni Angtud. Pagkakaron, walay eskuylahan sa Cebu City nga nipili sa face-to-face classes o ang pisikal nga pagtungha sa mga bata ngadto sa mga eskuylahan.
Apan kun dunay eskuylahan nga mopili niini, ang DepEd-Cebu City preparado na alang niini.
20 ka bata
Matud pang Angtud, 20 ka estudyante ra kada klase ang pasudlon ug kaduha lang sa usa ka semana sila patunghaon. Magagad sab kini sa gidaghanon sa mga tinun-an sa eskuylahan.
“Naa na say guidelines ana nga 20 pupils ra per classroom. Naay scheme nga twice a week ra ba or once a week ra ba,” matud ni Angtud.
Giklaro hinuon niya nga wala nila tutoki ang pisikal nga pagtambong sa mga bata sa eskuylahan tungod kay daghan gyung mga ginikanan ang supak niini tungod sa kabalaka nga mataptan sa sakit ang ilang anak.
Duna pay duha ka buwan aron makapreparar ang DepEd apan ini og human na sa enrollment nga magsugod sa Hunyo 1 sila makasugod paghipos sa mga impormasyon kun pila gyud ka mga bata ang nagpa-enroll ug pila kanila ang dunay access sa internet ug kadtong adunay gadgets nga magamit para niini.
Samtang gibutyag sab sa DepEd-Cebu nga mahal ra kaayo ang pangayo sa mga sibyaanan sa radio nga mao unta ilang gamiton.
Gibuhat na nila kini kaniadto apan ang DepEd Central office ang nibayad sa airtime.
Ang kadagkoan sa DepEd-Cebu City division gikatakdang makigtagbo sa Local School Board(LSB) karong Lunes aron tukion ang preparasyon.
Makigtagbo pa usab ang DepEd sa mga kadagkoan sa City Hall aron tukion ang kabahin sa mga eskuylahang gigamit nga Barangay Isolation Centers.(BIC).
Ang DepEd—VII’s regional office nitugot pagpagamit sa ilang mga eskuylahan isip BIC kutob lang sa Hunyo 15. /IBM (BANATNEWS)