Mga estudyante napaubos sa swab test

CEBU, Philippines — Gihimakak sa Dakbayan sa Sugbo ang pasangil nga wala gipaubos sa test kadtong mga estudyanteng gikan diri sa siyudad nga gipapauli ngadto sa ilang probinsya sa Maguindanao diin duna kanilay nagpositibo sa coronavirus (COVID-19) pagabot didto.

Si Mayor Edgardo Labella mimando paghimo og imbestigasyon nganong ang maong mga tinun-an gitugotan nga makabiyahe balik sa ilang mga lunsgod nga wala mapaubos sa COVID-19 test.

“Gipahigayonan gyud og swab test. Dili ta makaingon untested. Kay kini sila tested. Mao nay labing siguro. That is a confirmation coming from the Cebu City Health Department on that day nga gi-communicate sa Province of Maguindanao,” matud pang City Legal Officer Rey Gealon, ang tigpamaba ni Labella.

“Tested ni sila through swab testing ug niresulta sa PCR machine nga negative sila sa mao nga test,” pasabot pa niya.

Sumala pa nga niadtong adlaw nga Martes, 11 ka mga estudyanteng nangabot na didto sa ilang probinsya gikan sa Cebu City ang positibo sa COVID-19 matud pang Dr. Elizabeth Samama, ang hepe sa Maguindanao Provincial Hospital.

Dunay bag-ong 12 kanila ang positibo na sad sa COVID-19 pagabot didto sa Maguindanao. Ang maong mga tinun-an mi-avail sa  Balik Probinsiya Program sa ilang probinsya.

Protocol

Base imbestigasyon, si Gealon miingon nga tulo ka mga protocols ang giagian sa maong mga tinun-an subay sa rekisitos nga gipasunod sa Inter-Agency Task Force on Emerging Infectious Diseases (IATF-EID) niadtong mga mopauli o mobiyahe  balik sa ilang mga probinsya.

Ang maong mga tinun-an mianhi sa Sugbo aron mag-review alang sa architectural board examinations.

Niadtong Mayo 8, nakompleto nila ang mga rekisitos sama sa medical certificate gikan sa CHD nga nagpamatuod nga sila COVID-19 negative, nga balido sud sa 48 oras; travel pass gikan sa siyudad; ug repatriation clearance gikan sa local government unit nga ilang ulian.

“Kompleto ang maong requirements. Resulta, gitugotan sila,” matud ni Gealon. Apan ilang nadiskubrehan nga ang maong mga tinun-an wala molarga og Mayo 8 ang maong mga tinun-an, nga unta 48 oras lang nga balido ang ilang medical certificate.

Gihimo niyang basehan ang Facebook post sa page sa Makabagong PDRRMO Maguindanao, nga diin giingon didto nga ang maong mga tinun-an milarga padung sa Maguindanao niadto nang Mayo 14, pito ka adlaw human nila nakompleto ang ilang rekisitos.

“Atong ihimakak nga untested ang maong mga estudyante. It’s just that pagpaingon nila paglarga didto sa coast guard facility, wa na sila gi-test,” matud ni Gealon.

Nagduda si Gealon nga nataptan sila sa virus sa dapit diin sila nagpaabot sa ilang paglarga padung sa Maguindanao.

“Ug posible in the interim anang pag-issue nato sa ilang clearances ug medical certificate, didto nahitabo ang pagtinakdanay,” si Gealon miingon.

Ang maong mga estudyante temporaryong nagpuyo sa Plaridel Street, sa Brgy. Guadalupe, Sambag 2, ug Osmena Boulevard. /IBM (BANATNEWS)