CEBU, Philippines — Patay ang usa ka 67-anyos nga mag-uuma human gibunalan og kahoy ang ulo ug ubang bahin sa lawas niini niadtong Lunes sa hapon diha sa Barangay Mabuli, Lungsod sa Tabogon.
Si Police Staff Sergeant Ronie Alivio sa Tabogon Police Station niila sa biktima nga mao si Diosdado Espinoza, taga Purok Lumboy, Barangay Mabuli, Lungsod sa Tabogon.
Ang suspetsado mao ang amahan ug anak nga si Sergio Edwin Lipalam, 51ug Jayson Lipalam, 23, parehong residente usab sa lugar ug nasikop sa kapolisan human sa maong hitabo.
Matud ni Alivio nga sayo niadtong Lunes sa hapon nasigpatan sa mga silingan nga nag-inom ang biktima ug nahiagi si Sergio ug anak niini.
Giingong giagda og inom sa biktima si Sergio apan nibalibad kini nga maoy hinungdan sa ilang panaglalis hangtud nga nisangko na sa panag-away.
Giingong nakapunit og kahoy ang suspetsado nga maoy gigamit sa pagbunal ngadto sa biktima.
Matud ni Alivio nga dali silang nitubag sa alarma ug nasikop ang amahan ug anak kinsa kasamtangan karong gitanggong diha sa ilang detention cell sa Tabogon Police Station. /BDB (BANATNEWS)