CEBU, Philippines — Gitug-an ni Gobernador Gwendolyn Garcia nga nikabat sa 4,000 ang ni-apply ngadto sa Stranded Cebuanos Assistance Center.
Ang Kapitolyo nagtinguha kini paghatag og ayuda ngadto sa mga Sugboanon nga na-stranded ngadto sa ubang probinsiya human nga gisirad-an sa Probinsiya sa Sugbo ang borders niini nunot sa pagpatuman sa community quarantine tungod sa coronavirus disease (covid-19).
Ang Stranded Cebuanos Assistance Center mao kini ang giumol sa Kapitolyo pinaagi sa facebook aron makakuha ang mga na-stranded og impormasyon lakip na sa form kon asa mamahimo nilang mo-fill-up sa ilang impormasyon kon sila tinud-anay ba nga Sugboanon nga na-stranded ngadto sa laing lalawigan.
Matud ni Garcia ang kadtong 4,000 dili tanan mahatagan sanglit ang uban kanila dili kwalipikado.
Giingong ang uban niini posibleng wala gyud ma-stranded diin adunay mga Sugboanong dugay ra nga nagpuyo ngadto sa laing probinsiya apan nagtuo nga makaapil sa ayuda tungod kay mga Sugboanon sila.
Matud usab ni Garcia nga ang Kapitolyo nagsugod na kini pagtawag sa mga ni-apply base sa contact number nga gibutang niini ngadto sa form nga ilang gisubmiter.
Kini isip pamaagi sa pag-validate sa mga pangangkon sa mga nag-apply.
Tabang
Sa laing bahin, ang Archdiocese of Cebu uban ang Cebu Caritas, Incorporated ug Commission on the Laity nitunol na usab sa ilang ikaduhang hugna nga tabang alang sa Cebu City Jail kagahapon sa hapon.
Nangulo sa pagtunol sa maong ayuda ang chairman sa Cebu Caritas Inc. nga si Reverend Father Alex Cola.
Ang gitunol nga relief goods diha sa city jail naglangkub kini sa 284 ka face shields; 3, 310 sa face masks; 533 boxes sa vitamins C; 200 ka hair net; 79 ka body shield ug 3,000 ka linutong itlog gikan sa Five Loaves and Two Fish.
Matud ni Cola nga ang unang hugna nga hinabang mao ang 300 boxes sa vitamin C diin gihatud kini sa Commission on the Laity nga gipangulohan ni Fe Mantuhac-Barino.
Samtang nakatunol na usab og ayuda ang Archdiocese of Cebu uban ang Cebu Caritas Inc. ug Commission on the Laity sa tabang alang sa Sitio Zapatera, Barangay Luz nga gilangkuban sa mga bugas, delata, gatas, linutong itlog, lakip ang sud-an nga paklay, mineral water, ug vitamins C. Rowena D. Capistrano/BDB (BANATNEWS)