CEBU, Philippines — Gihulagway ni Cebu City Mayor Edgardo Labella nga opinyon lang ang pamahayag ni Bise Mayor Michael Rama nga nagkwestiyon sa iyang katakus sa pagdumala niining gisagubang nga kriris sa panglawas sa siyudad.
Si Rama nahutdan og pasensya sa giingong hinay nga aksyon sa administrasyon ni Labella ug kapakyas sa pagtuman sa mga saad niini.
Gisaway ni Rama ang kahinay sa pag-ugmad sa quarantine facility sa North Reclamation Area nga unang gipahibawo nga mahuman lang sa 10 ka adlaw.
Apan si Labella wala na kaayo mohatag og dugang komento mahitungod sa pamahayag ni Rama ug igo lang niingon nga opinyon kini sa bise mayor.
Dugang ni Labella nga magpadayon lang siya og himo sa iyang trabaho ilabi na niining krisis nga nasinati karon sa tibuok nasud ilabi na sa Siyudad sa Sugbo.
“Tha’s his opinion, we will just continue to stay focus, we have a job to do and we are in the midst of this crisis, let just do our jobs,” matud ni Labella.
Gihimug-atan niini nga dili siya magpaapekto sa komento nga ipagawas tungod kay duna siya’y trabahoon nga naghatag og risgo sa kinabuhi sa katawhan sa Siyudad sa Sugbo dungan sa pagbutyag nga limpyo ang iyang konsensiya.
“I’ll just stay focus to my job, I have a very important to do for our people in the City of Cebu and I think it is the people who are the best judge of what we have done, and what we intend to do,” dugang sa mayor. Rowena D. Capistrano/GMR (BANATNEWS)