CEBU, Philippines — Nipasar og ordinansa ang hunta probinsiyal sa Sugbo nga nagsilot sa mga manaugdaug sa mga frontliners batok sa coronavirus disease.
Ang Frontliners Anti-Discrimination and Harassment Ordinance of the Province of Cebu gipangamhanan ni Bokal Kerrie Keanne Shimura, ang chairman sa committee on health sa Provincial Board.
Ubos sa ordinansa, ang mga mayor o ang local government units mohatag og "exclusive" nga sakyanan sa ilang mga frontliners nga mopadulong sa trabaho panahon sa public health emergency.
Ang dili pagtugot sa mga frontliners nga makasakay sa public transportation mamahimo usab nga masilotan lakip na kadtong mopugong o modili sa mga frontliner nga mosulod sa mga puy-anan niini sama sa boarding house.
"Except if his or her presence is indeed perilous to the interest of nearby residents or where his or her continued presence will surely cause possible spreading of infectious disease which cannot be prevented or curbed by any precautionary measures," pagbasa sa ordinansa.
Ang makalapas masilotan og dili molapas sa P5,000 o pagkapriso sulod sa usa ka tuig. /GMR (BANATNEWS)