CEBU, Philippines — Gipahibalo sa mga nagdumala sa Cebu North Bus Terminal (CBNT) ang temporaryong pagpahunong sa ilang operasyon nga magsugod karong adlawa, Marso 29, 2020.
Si Zosimo Jumao-as Jr., pangulo sa CNBT nagkanayon nga kini ilang pagahimuon nunot usab sa pagpatuman sa enhanced community quarantine sa Dakbayan sa Mandaue ug Lalawigan sa Sugbo nga magsugod sa pag-epekto sa 12:01 sa kaadlawon karong Marso 30, 2020 o sa adlaw nga Lunes.
Sa nasayran nga ang mga sakyanan gikan sa kalungsoran sa amihanag bahin sa lalawigan ang dili na makasulod sa Dakbayan sa Mandaue nunot usab sa ipatuman nga ECQ sa kagamhanan sa maong siyudad.
Sa laing bahin, motanyag og libreng sakay ang kagamhanan sa Dakbayan sa Naga alang sa mga tawo nga ang trabaho nalakip sa exempted sa ECQ ug sa mga nagkupot og quarantine pass (QP) sugod ugmang adlawa.
Si Mayor Kristine Vanessa Chiong nakigtigom sa COVID-19 Task Force ug nihatag og mga kamandoan alang sa mga moserbisyo sa libreng sakay.
Si Gobernador Gwendolyn Garcia mopatuman sa ECQ ugma hinungdan nga ang kagamhanan sa siyudad nihimo usab og aksiyon aron dili maglisod ang ilang mga konstituwente niining panahon sa krisis sa panglawas.
Gi-awhag ni Chiong ang mga trabahante sa mga kompaniya nga exempted sa ECQ sa pagdala kanunay sa ilang ID ug certification nga nagpamatuod nga exempted ang ilang kompaniya sa prohibition.
Sa oras sa pagsuwat niining balita gihan-ay na sa siyudad ang kompletong rota ug oras sa libreng sakay. Gabriel C. Bonjoc/BDB (BANATNEWS)