CEBU, Philippines — Gipaubos sa home quarantine ang kapin sa 100 ka molupyo sa Barangay Alang-Alang sa Dakbayan sa Mandaue ug gisirdao ang katunga sa dalan P. Burgos sa maong lugar diin higpit kini nga gibantayan sa kapolisan.
Si Dr. Rose Ouano–Tirado nga maoy city health officer sa dakbayan niingon nga gihimo ang maong lakang tungod sa presumptive positive sa Coronavirus Disease nga pasyente nga gisulod karon sa tambalanan sa Dakbayan sa Sugbo nga nagpuyo sa maong dapit.
Ang maong mga molupyo ang gawasnon sa ilang paglihok-lihok apan ang pipila kanila labi na gyud kadtong nagpuyo duol sa gipuy-an nga panimalay sa pasyente ang higpit nga gidid-an sa pagbiya sa ilang pinuy-anan.
Magbantay ang kapolisan sa maong lugar sulod sa 14 ka adlaw nga pagpatuman sa home quarantine ug kini pagahimoon alang sa pagkontrolar sa mga kalihukan sa mga molupyo ug ingon man sa pagseguro nga walay makasupak sa gipatuman nga quarantine protocols.
Ang City Health Department nga ubos sa superbisyon sa Department of Health ang nagpahimutang usab og mga tawo sa maong lugar sa pag-abag sa kapolisan.
Gitugutan lang ang mga nagpuyo sa maong dapit sa paggawas alang sa pagkuha sa ilang mga panginahanglan o basic supplies apan ipaubos sila sa thermal checkup ug disinfection procedures sa ilang pagbalik.
“Gitugutan ra man gihapon hinoon mi nga makagawas pero usa ra gyud ka sakop sa matag usa pamilya,” matud sa usa ka molupyo sa maong dapit.
“Naa nag-assist na barangay official nga maoy mo-certify o moila nga tinuod gyud nga usa sa mga sakop sa usa ka pamilya ang buot mogawas,” dugang pa niini. Sa gipahimutang nga tent sa maong dapit maoy makita ang mga polis ug mga health workers sa entrada sa dalan Burgos sa Barangay Alang-Alang sa Dakbayan sa Mandaue.
Si Dr. Ouano-Tirado niingon nga ang tanang barangay sa dakbayan nga naglakip na sa Barangay Alang-Alang ang ipaubos sa disinfection sa pagpugong sa COVID-19. /GMR (BANATNEWS)