CEBU, Philippines — Gipahibawo ni Cebu City Mayor Edgardo Labella nga andam ang kagamhanan sa siyudad nga mopalit og test kits alang sa coronavirus disease (COVID19).
Kini human ang Department of Health nibutyag nga 500 lang ka test kits ang mahatag alang sa Central Visayas.
Sigun ni Labella nga dugay ra sila nangita og test kits alang sa mga residente sa siyudad.
Giingong dunay niabot nga 100 ka test kits gikan kang Presidential Assistant for the Visayas, Secretary Michael Dino, apan si Labella niasoy nga andam sila mopalit og dugang test kits.
Samtang tun-an sab ni Labella ang hangyo sa mga konsehal sa Bando Osmeña Pundok Kauswagan (BOPK) nga naghangyo kaniya nga gamiton ang bakanteng luna sa South Road Properties isip quarantine centers alang sa persons under investigation (PUI) ug persons under monitoring (PUM) sa COVID-19.
Disaster fund
Sa iyang bahin si Gob. Gwendolyn Garcia nibutyag nga andam ang Probinsiya sa Sugbo nga mopalit og testing kits.
Matud ni Garcia nga adunay disaster fund and Kapitolyo nga maoy pwede gamiton sa pagpalit sa maong testing kits aron dali na ang paggawas sa resulta kung ang usa ka PUI positibo ba or dili sa COVID-19.
Si Garcia nagkanayon nga adunay supplier nga gusto makighinabi kalabot niini apan kinahanglan pa nila tan-awon ang mga dokumento ug sutaon kun aprobado ba kini sa Food and Drug Administration (FDA).
PPE ipadali
Samtang ipadali ni Talisay City Mayor Gerald Anthony “Samsam” Gullas Jr. ang pagpalit sa dugang personal protective equipment (PPE) nga gamiton sa mga frontliners sa kabarangayan.
Matud niya nga doble na ang ilang paningkamot nga makapalit sa maong mga butang aron maprotektahan ang mga nihatag og serbisyo sa mga PUM ug PUI.
Kagahapon ang mayor nakigtagbo sa kadagkuan sa pribadong tunghaan ug gihisgutan ang mga lakang samtang gisuspenso una ang mga klase.
Sigun pa niya nga ang Executive Order ni Garcia ilang sundon.
Curfew
Samtang si Police Major Gerard Ace Pelare, hepe sa Talisay City Police Station, niingon nga alas 10 sa gabii sugdan nila ang curfew.
Iyang gipasabot nga ila unang badlungon ug papaulion ang mga maglaroy-laroy lapas sa maong oras apan ang magmagahi ilang dakpon.
Hinoon adunay exemption alang ngadto sa mga tawo nga adunay balidong rason lapas sa oras sa curfew. Le Phyllis F. Antojado, Gabriel C. Bonjoc/GMR (BANATNEWS)