CEBU, Philippines – Nikabat sa 170 ka tawo ang nasikop sa gipahigayon nga operasyon sa kapolisan batok sa ilegal nga buwang niadtong niadtong Martes sa hapon diha sa Barangay Poblacion, Dakbayan sa Carcar.
Matud sa direktor sa Cebu Provincial Police Office (CPPO) Police Colonel Rhoderick Mariano nga nasuta nila nga walay permit ang gipahigayong buwang diha sa cockpit arena sa nahisgutang lugar.
Giingong ang permit nga gihatag sa maong buwangan alang lang sa adlaw nga Sabado, Domingo ug holiday apan nagpahigayon kini og tigbakay atol sa dili tukmang adlaw.
Atol sa pagpangronda sa kapolisan nasikop ang maong gidaghanon sa mga tawo nga diha sulod sa buwangan ug giingong uban kanila ang nangasamad tungod kay naglibwag kini og panagan ug adunay uban nilayat sa kural.
Nasakmit sa mga polis ang 35 ka manok nga pangsabong ug laing duha ka manok nga pangsabong nga patay na ug P16 mil nga kwarta nga gituohang pusta.
Ang mga dinakpan kasamtangang gitanggong diha sa Carcar City Gym ug gikatakdang pasakaan og kasong kalapasan sa “Presidential Decree 1602”o ilegal nga pagpahigayon og buwang.
Sa laing bahin, upat ka lalaking naghantak ang nadakpan sa pagpangronda sa mga sakop sa Provincial Intelligence Branch (PIB) diha sa Barangay Candulawan, Dakbayan sa Talisay niadtong Martes sa gabii.
Ang mga nadakpan mao sila si Casimero Ruja Briones, 37-anyos; Ronald Briones Bacacao, 37; Daniel Cabaluna Castañares, 45 ug James Ryan Cutara Cabañero, 33.
Si Police Lieutenant Colonel Marlu Conag, hepe sa PIB nagkanayon nga nakadawat sila og impormasyon kabahin sa ilegal nga tigbakay diha sa lugar diin sa kilid sa tigbakayan adunay hantak.
Pag-abot sa operatiba nikaratil og dagan ang mga sugarol apan nagunitan sa mga polis ang nahisgutang mga suspetsado.
Nasakmit sa mga polis ang tulo ka .25 sentimos nga antogon ug P200 nga pusta.Rowena D. Capistrano, Gabriel C. Bonjoc/BDB (BANAT NEWS)