CEBU, Philippines – Usa ka patay’ng lawas sa lalaki ang napalgan kagahapon sa buntag diha sa Sitio Camp 5, Barangay Manipis, Dakbayan sa Talisay.
Si Police Major Gerard Ace Pelare, hepe sa Talisay City Police Station nagkanayon nga nakadawat sila og report kagahapon sa buntag kabahin sa maong patayng lawas.
Ang mga motorista nga niagi diha sa lugar ug mga residente ang nakakaplag sa patayng lawas nga nagbuy-od diha sa daplin sa karsada diin aduna kini samad pinusilan.
Ang biktima taas ang buhok niini, nagsul-ob og karsones, sapatos apan wala kini sinena sa ibabaw’ng bahin sa lawas ug ang nawong niini gitaptapan og t-shirt nga kolor blue.
Matud ni Pelare nga adunay itom nga auto ang nakita sa mga residente nga nilabay sa lugar dayon nadungog ang buto-buto sa armas.
Ilang nakita ang biktima nga gibiyaan diha kilid sa karsada nga wala nay kinabuhi.
Matud ni Pelare nga gipaabot nila nga adunay mga tagtungod nga mo ila sa biktima aron masusi nila ang background niini. /BDB (BANAT NEWS)