Nigerian nisuway og lugos sa classmate sikop

CEBU, Philippines – Natingkagol sa detention cell sa Abellana Police Station ang usa ka medical student nga Nigerian national human kini pasanginling nisuway og lugos sa iyang classmate kagahapon sa kadlawon diha sa Barangay Sambag 1, Dakbayan sa Sugbo.

Ang suspetsado mao si Soky Obdimge, 21-anyos, kasamtangang nagpuyo diha sa Barangay Duljo Fatima, Dakbayan sa Sugbo.

Matud sa hepe sa Abellana Police Station Police Major Elisandro Quijano nga nangayo og tabang ang biktima dihang gisuwayan kini sa paglugos sa suspetsado.

Base sa imbestigasyon sa kapolisan nga pasado alas 3:00 sa kadlawon kagahapon nigawas sa iyang boarding house ang biktima aron mopalit unta og pagkaon.

Giingong kalit kining giduol sa suspetsado ug gisukmag ang tiyan niini dayon gituok, gihagkan ang mga ngabil ug gikumot ang suso.

Ang mga kauban sa biktima sa boarding house nakamata kini tungod sa nahitabong kasikas ug dali usab nga nisibat ang suspetsado.

Ang biktim dali kining ni-report sa kapolisan sa maong hitabo.

Ang kapolisan nipahigayon og follow-up operation diin ang suspetsado nasikop diha sulod sa eskwelahan niini.

Nasayran sa mga polis nga atol sa insidente giingong hubog ang suspetsado.

Giingong ang maong insidente dili ang unang higayon diin ang suspetsado gireklamo na kini sa niaging tuig tungod sa pagpanghikap niini og suso sa usa usab ka estudyante.

Ang suspetsado nihimakak kini sa mga pasangil batok kaniya. /BDB (BANAT NEWS)