CEBU, Philippines – Kagamhanan sa Dakbayan sa Sugbo andam mohatag sa Cebu City Police Office og mga bulletproof vests human sa pagkapatay kang Police Master Sergeant Maximino Macua atol sa ilang buybust operation diha sa Barangay Mambaling.
Si Mayor Edgardo Labella sa dihang gihinabi kini sa mga tigbalita atol sa pagbisita niini sa haya sa maong polis sa punerarya siya miingon nga andam motabang ang siyudad makabaton og bulletproof vest ang kapolisan sa dakbayan. Nitunol ang kagamhanan sa pamilya sa namatay og ayuda ug gimandoan si Police Colonel Engelbert Soriano, City Director sa Cebu City Police Office nga ipapangita ang mga nakapatay kang Macua.
Wala magsul-ob si Macua og bulletproof vest atol sa operasyon nga diin giingong siya maoy nagsilbing poseur buyer ug nakigatubang sa drug pusher nga subject sa maong operashyon diha sa Tabada Street, Barangay Mambaling.
Di mokompiyansa
Tungod sa nahitabo kang Macua, ang hepe sa kapolisan sa Dakbayan sa Talisay si Police Major Gerard Ace Pelare nitambag sa mga sakop nga dili gyud mokompiyansa sa ilang operasyon.
Ang Dakbayan sa Talisay usa sa mga gipanghinganlan ni Pres. Duterte nga naghitak pa gihapon ang illegal nga drugas. Gimando ni Pelare sa mga sakop nga pusilon ang mga suspek kun nameligro na ilang kinabuhi. Miabot na sa 200 ka tawo kapin ug kulang nga nalambigit sa ginadiling drugas ang nadakpan sa kapulisan sa Syudad sa Talisay niining lang tuiga. Gawas sa mga operasyon naghimo sab sila si Pelare og mga house visitation diha sa Barangay Tanke nga gihugpaan kaniadto og ilegal nga drugas.
No Valentines Day
Samtang si Police Brigadier General Albert Ignatius Ferro, Police Regional Office 7 Regional Director miingon nga dili nila pasagdan ang pamilya ni Macua kinsa nisakripisyo sa iyang kinabuhi tungod ug alang sa panerbisyo isip usa ka polis.
Sumala pa ni Ferro petsa 20 sa Pebrero adto ilubong sa Bohol si Macua ug hatagan kini sa tanang seremonyas nga haom kaniya. Agi og pagbangotan uban sa pamilyang Macua, ang PRO-7 dili magselebrar og Valentine’s Day karong adlawa aron unongan ang mga namatyan.Gabriel Bonjoc ug Sheriza Mae Uy/IBM (BANAT NEWS)