CEBU, Philippines – Pormal na nga nilingkod sa katungdanan ang bag-ong regional director sa Police Regional Office 7.
Si Police Brigadier General Israel Dickson, director sa Directorate for Integrated Police Operation for Visayas ang nangulo sa ceremonial assumption ni Police Brigadier General Albert Ferro.
Mapasalamaton si Ferro sa bag-ong hagit sa lidero sa iyang paglingkod sa Central Visayas ilabi na nga usa kini nga gitutukan ni Presidente Rodrigo Duterte sa kampanya batok sa ilegal nga drugas.
Buot ni Ferro nga palapdan pa gyud ang intelligence network sa kapolisan ubos sa iyang liderato human nagpabilin ang problema sa ilegal nga drugas bisan pa sa paghingusog niini sa pagsugod pa lang sa kampanya.
Iyang gitataw nga ang pagkahiusa sa komunidad ilabi na sa paghatag og impormasyon daku kini nga tabang sa kampanya.
Daku ang pasalamat ni Ferro kang PNP Chief Police Director General Archie Gamboa sa higayon nga gihatag kaniya sa Central Visayas. Tinguha niya nga mabalik ang pagsalig sa publiko ngadto sa kapolisan pinaagi sa “no take policy” gikan sa lain-laing matang sa ilegal. Nitambong sa iyang paglingkod sa PRO-7 ang kanhi regional director nga si Police Major General Debold Sinas nga karon mao ang director sa National Capital Regional Police Office ug mga staff sa NCRPO isip pagpakita og suporta sa PRO7. /GMR (BANAT NEWS)