CEBU, Philippines – Dul-an sa P6 milyones nga balor sa illegal nga drugas ang nasakmit sa duha ka buy bust operations sa kapulisan sa Dakbayan sa Sugbo Lunes sa gabii.
Sa operasyon sa Sitio Bato, Barangay Ermita nasikop sila si Gerry Mullanda, 50, ug Cindy Marie Eniciula, 28. Ang operation gipangulohan nilang Police Captains Romeo Caacoy ug Joffre Grande.
Nasakmit sa duha ang 200 gramos nga gidudahang shabu nga mokantidad og P1,360,000.00 base sa Dangerous Drug Board Value, sudlanan sa drugas ug buy bust money. Ang ikaduhang operasyon nahitabo sa Sitio San Roque, Barangay Hipodromo ug nadakpan si Roland Cabasaan, 38, Rodel Dungog, 24, Eduardo Chavez, 45, mga residente sa maong lugar.
Ang operasyon gihimo sa Station Drug Enforcement Unit sa Mabolo Police Station sa Cebu City Police Office.
Nasakmit gikan sa mga dinakpan ang 675 gramos nga gidudahang shabu nga mobalor og P4,590,000.00 base sa DDB value ug buy bust money.
Matud pa ni Police Major Dindo Alaras, hepe sa Mabolo Police Station miingon nga pipila ka bulan na nilang gibantayan si Cabasaan kansang pangalan kanunay ibutyag sa una nilang mga nadakpan.
Sa Talisay City, duha ka tawo ang nadakpan sa buwag nga operasyon sa kapolisan diha sa Barangay Tanke ug Barangay Lagtang sa miaging hapon.
Ang nangadakpan mao sila si Archie Apple Demata, 37, ug Allan Marquez, 33. Gabriel Bonjoc/IBM (BANAT NEWS)