CEBU, Philippines – Gipusil patay ang usa ka polis sa riding in tandem sa national highway sa Tapon, San Jose, Negros Oriental.
Giila ang biktima nga si Police Executive Master Sergeant Roldan Esmajer, taga Tapon Norte sa maong lungsod apan lumad nga taga San Joaquin, Dakbayan sa Iloilo.
Matud ni Negros Oriental Provincial Police Office Director Julian Entoma nga posible nga gisundan gikan sa panimalay si Esmajer samtang sakay sa motorsiklo.
Nakaangkon og tulo ka samad pinusilan si Esmajer sa iyang lawas gikan sa wala pa matino nga kalibre sa armas.
Gidala sa tambalanan sa Dakbayan sa Dumaguete ang biktima apan nakabsan gyud kini sa kinabuhi.
Matud ni Entoma nga tulo ka anggulo ang ilang gisubay sama sa personal nga atraso, may kalabutan sa iyang trabaho ug ang New People’s Army.
Sa niaging tuig nakasakmit ang grupo ni Esmajer og kapin sa usa ka kilo nga gituohang shabu ug gituohan nga gibawsan ang polis.
Gihulagway ni Entoma si Esmajer nga usa ka maayo nga polis ug wala kini nalambigit sa ilegal nga kalihukan.
Nakakuha og slug sa bala sa M16 ang mga sakop sa Scene of the Crime Operation sa dapit diin nahitabo ang pagpamusil.
Gituohan nga gigamitan kini og revolver nga matang sa armas nga gibalahan sa bala sa M16.
Nisulod sa serbisyo isip recruit si Esmajer niadtong Septiyembre 30, 1998 ug nadestino sa NORPPO ug nalabay og pipila ka buwan ngadto sa Police Regional Office 18 ug nabalik niadtong Enero 2018. /GMR (BANAT NEWS)