Sinug sa Mabolo mas paninduton

CEBU, Philippines —  Malampuson ang gihimong ikaduhang Mabolo Sinug Festival niadtong adlaw nga Sabado nga gipasiugdahan sa ilang kanhi barangay kapitan ug karon Konsehal sa siyudad nga si Niña Prisca Mabatid kinsa nagtinguhang paninduton pa gyud kini sa sunod tuig.

Si Mabatid nagkanayon nga pinaagi niini, napakita nila nga daghang talentadong taga Mabolo.  Gibahin og kapito ka clusters ang 22 ka sitio sa barangay ug nagtigi sa pagsayaw.

Ang selebrasyon anha gihimo atubangan sa simbahan sa Saint Joseph the Worker Parish nga gitambongan sa liboang mga tawo nga dili lang taga Mabolo.

Apil sa nitan-aw si Cebu City Mayor Edgardo Labella kinsa residente sab sa maong barangay uban ni Cebu City Vice Mayor Michael Rama. Ilang gipahinumdoman ang mga Mabolohanon nga dili kalimtan nga ang sikat karong Sinulog Festival anha nagagikan sa Sinug sa Mabolo.

“We have this activity in honor of Señor Sto. Niño and to give highlights the history of Sinulog kay dakung garbo ni namo nga taga Mabolo nga ang Sinulog nahimong dakung event,” sumala pang Mabatid kinsa mapasalamaton sab sa siyudad sa pagtabang nga magmalampuson ang kalihokan.

Ang mga nakadaog sa Ritual Showdown mao ang Cluster 7(champion);  1st place : Cluster 4; 2nd place: Cluster 5; 3rd place : Cluster 6; ug 4th place: cluster 1.

Sa Best in Street Dancing mao ang Cluster 4. Samtang ang Festival Queen  Champion ang taga cluster 4; sa float ang Cluster 4 samtang sa Higantes ang Cluster 7. IBM (BANATNEWS)