Talisay nagkinahanglan og mga engineer
CEBU, Philippines — Ang kagamhanan sa Dakbayan sa Talisay nanginahanglan kini og walo ka engineer.
Kini human nakita ni Mayor Gerald Anthony “Samsam” Gullas Jr. ang kalangay sa mga proyekto nga masugdan tungod sa ka kuwang sa mga engineer nga makahimo og program of works.
Matud ni Gullas nga ang siyudad andam kining mo-hire og walo ka civil engineers ug gilauman niya nga dali na unya mapatuman ang mga proyekto sa siyudad kong aduna nay madawat nga mga bag-ong engineer.
Si Kapitan Josefina Consial sa Barangay Candulawan ug presidente sa Association of Barangay Council (ABC) nihangop sa maong plano ni Gullas.
Gibutyag ni Consial nga nanghinaot usab sila nga adunay dugang engineer ang siyudad aron dili na malangay ang implementasyon sa mga proyekto diha sa kabarangayan.
“Naa gani nga last year pa ang plano ug ang budget pero hangtud ron wala pa gyud masugdan kay wala paman mahuman ang program of works”, matud ni Consial.
Si Gullas niawhag sa mga interesado nga engineer nga moduol lang diha sa buhatan sa Human Resources and Management Office (HRMO) aron isumitir ang ilang mga dokumento. /BDB (BANATNEWS)
- Latest
